من رباعيات صلاح جاهين

السلام عليكم ورحمة الله وبركاته
اولا انا بعتذرلكم عن غيابى عن المنتدى الفترة الطويلة دى ، وحبيت ان اول حاجة أرجع بيها تكون
رباعيات صلاح جاهين ، انا وعدتكم اننا فى كل مرة هنقول جزء منها لغاية مانكملها كلها ان شاء الله ، ودلوقتى اسيبكم تستمتعوا بقراءتها.

** خرج ابن آدم من العدم ، قلت: ياه.
رجع ابن آدم للعدم، قلت : ياه .
تراب بيحيا ..... وحى بيصير تراب .
الأصل هو الموت وللا الحياة !
عجبى !!!!
* * * *
** أنا شاب لكن عمرى ألف عام .
وحيد لكن بين ضلوعى زحام .
خايف ولكن خوفى منى أنا .
أخرس ولكن قلبى مليان كلام .
عجبى !!!!
* * * *
** إيش تطلبى يانفس فوق كل ده
حظك بيضحك وإنتى متنكدة
ردت قالتلى النفس :_ قول للبشر
مايبصوليش بعيون حزينة كده .
* * * *
** فى يوم صحيت شاعر براحة وصف
الهم زال والحزن راح واختفى
خدنى العجب وسألت روحى سؤال
أنا مت ؟ ولا وصلت للفلسفة
عجبى !!!
* * * *