من رباعيات صلاح جاهين

بسم الله الرحمن الرحيم
طبعا مافيش حد فى الدنيا مابيحبش صلاح جاهين، علشان
كده قررت اجيبلكم جزء بسيط من رباعياته ، وكل مرة هجيبلكم جزء لغاية مانكمل رباعياته كلها ..

فتحت شباكى لشمس الصباح
مادخلش منه غير عويل الرياح
وفتحت قلبى عشان أبوح بالألم
ماخرجش منه غير محبة وسماح
عجبى !!


* * * *

لو فيه سلام فى الارض وضمان وامن
لو كان مفيش ولا فقر ولا خوف وجبن
لو يملك الانسان مصير كل شىء
انا كنت اجيب للدنيا ميت الف ابن
وعجبى !!

* * * *

حاسب من الاحزان وحاسب لها
حاسب على رقابيك من حبلها
راح تنتهى ولابد راح تنتهى
مش انتهت احزان من قبلها ؟
عجبى !!

* * * *

يأسك وصبرك بين ايديك وانت حر
تيأس ما تيأس الحياة راح تمر
انا دقت من دا ومن دا عجبى لقيت
الصبر مر وبردك اليأس مر
وعجبى !!

* * * *

لا تجبر الانسان ولا تخيره
يكفيه مافيه من عقل بيحيره
اللى النهارده بيطلبه ويشتهيه
هو اللى بكرة هيشتهى يغيره
وعجبى !!